ESKOLAKO IKASLEEN BLOGA: 2015-05

2015/05/18

HERRI IBILTARIAK-ARKITEKTURA

Lehen gizakiek naturak eskaintzen zituen babeslekuak erabiltzen zituzten, kobazuloak adibidez. Baina ibiltari bihurtu behar izan zuten eta leku batetik bestera ibiltze horrekin etxebizitza arina, altxatzeko eta kentzeko erraza eta inguruan aurkitutako materialez eginda behar izan zuten. Tipiaren eredua ikusi dugu, maketatxo bat eginez. Bukatzeko, ikastetxeko parkean tribuka babesleku bana altxatu dugu eta konturatu gara ibiltari izatea ez dela hain erraza!

2015/05/15

IBILALDI EDERRA ITXASPERA

5. ETA 6. MAILAKOEN BERTSO SAIOA

Ikasturteari amaiera benetan polita eman zioten. Joan den asteartean, maiatzaren 12an, arratsaldeko 17:30etan ikasleek beraiek osatutako bertsoak eskaini zizkieten bertaratu zirenen guztiei. Zaragueta Herri Eskolako eta Ikastolako 5. eta 6. mailetako neska-mutilak Ikastolan dagoen aretoan elkartu ziren bertsoak kantatzeko. Ikasturtean zehar, hamabostean behin, bertso saioa egiten dute nork bere ikastetxetan eta han osatutakoak abestu zituzten asteartean. Iñaki Gurrutxaga etortzen da Zaragueta Herri Eskolara eta Jokin Uranga ikastolara. Biak, Jokin eta Iñakik eman zioten sarrera, ondoren ikasleak beraien bertsoak eskaini zizkiguten eta bukatzeko Rosi Lazkanok bereak bota zituen. Hurrengo urtekoari zain jarrita gaude, San Ferminetan bezala.

2015/05/14

ESKOLA AGENDA 21EKO UDAL BATZARRA

Ikasturteko lana borobiltzeko ekintza garrantzitsua.

> Maiatzaren 11an goizeko 10etan ospatu zen Udal batzarra. Bertan, Eskola Agenda21eko ikasle ordezkariak ( LH osoko eta DBHko ikasleak), LH 5 eta 6ko ikasle eta tutoreak, EA21eko koordinatzaileak, Araziko teknikaria, alkatea eta guraso gutxi batzuk egon ziren. Bileran horretan 2 eskoletako EA21eko ordezkariek udalari elikadura jasangarriaren gaiaren inguruan hainbat proposamen eta konpromezu aurkeztu zizkioten. Alkateak egindako proposamenei erantzun zien eta kontuan hartuko zituela adierazi zien ikasleei. Beñat Solaberrieta alkateak bereziki herritarrok bertako produktuak kontsumitu beharko genituela azpimarratu zuen eta herrian bertan erostea bezalakorik ez legokeela herriarentzat esan zuen. Ikasleen parte hartzearen aurretik Arazikoek EA21 zertan datzan azaltzeko oso bideo polita aurkeztu zuten eta gero, urte osoan eskoletan EA21aren inguruan egindako lana argazkietan ikusteko aukera izan genuen eta benetan ikasleak egindako lanarengatik zoriondu behar dira.

2015/05/05

ERLAUNTZA-ARKITEKTURA TAILERRA

Komunitatean bizitzearen eredu onenetariko bat erlauntza da. Erleek, ahalik eta argizari gutxien gastatzeko, zilindroak eraikitzen dituzte eztia biltzeko asmoz. Espazioa aprobetxatzeko, zilindroak inguruan dauzkaten 6 zilindroekin zanpatuko dituzte hexagono forma hartu arte.

Erleak gu bezain langileak dira!!!!